دور برد و كحه منتشر بين الاطفال - الفيروس المخلوي التنفسي
دور برد و كحه منتشر بين الاطفال - الفيروس المخلوي التنفسي
✅ الفيروس المخلوى التنفسى
Respiratory syncytial virus (RSV)
✅ مش فيروس جديد ولا حاجه، ده فيروس معتاد بييجى كل سنة مع دخلة الخريف، و أغلبية اطفالنا بياخدوا العدوى دى قبل ما يوصلوا لسن المدرسة
✅️ السنه دى بقى بالذات عالميا هو أصعب من المعتاد، المستشفيات فى امريكيا مليانه...الاعداد اضعاف السنه اللى فاتت....و العيادات هنا برده للأسف مليانه
✅️ ليه السنه دى بالذات اصعب؟ واحد من التفسيرات ان الاطفال مناعتها للفيروسات التنفسيه ضعفت كتير فى فترة كورونا و العزل و الماسكات...لانهم ماكانوش خالص بيتعرضوا للعالم الخارجى...
ده غير ان معاه سلالة كورونا جديده ...هى صحيح اخف من زمان...بس لو طفل جاله الفيروس التنفسى ده و بعدين كورونت بيبقى الولد فعلا مش ناقص يعنى...فبيخف و يتعب ...و يخف و يتعب
و للأسف بره فيه انفلوانزا الخنازير رجعت....وارد تبقى معانا برده....
انا مش عايزه اخضك و الله...انا بس لوضح لك الموقف بمنتهى الشفافيه...علشان نركز مع الولاد
❓ بيتنقل ازاى؟
✅ حد كح او عطس جنب الطفل
✅ حد بيبوس الطفل
✅ الطفل لمس اى سطح عليه الفيروس و بعدها لمس الانف او العين او الفم
✅ اطفال بتشرب مكان بعض، او بتاكل مكان بعض
✅ اطفال مش بتغسل ايديها بشكل صحيح و كافى
-الطفل ممكن يفضل مُعدى لمدة اسبوع،و ساعات اطول
❓أعراضه ايه؟
بتلاقى الطفل عنده رشح خفيف و شوية قريفه....
شوية و يبدأ يكح كحة ناشفه...
بيسخن....سخونيه متوسطه
مش عايز ياكل خالص...و يمكن مش عايز حتى يرضع...خصوصا ان المخاط مضايقه و ساعات يرجعه مع اللبن، او ينزل فى الستول!
شوية و تلاقى الكحه بقت ببلغم مش ناشفه
نفسه مش مرتاح...كأنه بينهج....بيتنفس بصوت...قلبه بيدق بسرعه شوية عن المعتاد....مجهد اوى
مش بيتحسن زى ادوار البرد العاديه...بالعكس الكحه مكمله...و كل يوم اغلس من اللى قبله...
نزلة شعبيه....و لما نتجاهل العلاج...يقلب بإلتهاب رئوى و الطفل يتحجز
❓هل هو خطير؟
✅ ناخد احتياطنا، بس ما نترعبش،
✅ اطفال كتير بتاخده و مناعتهم بتقاومه لوحدها، من غير حتى ادوية، و ممكن جدا يكون جه للاولاد عندك و انتهى و انتى فاكراه دور برد
✅ بنقلق على ٣:
١. الاطفال تحت سنه، و الاطفال اللى اتأخر علاجها
٢. اصحاب الامراض المزمنة زى الربو مثلا
٣. كبار السن،علشان كده لو الطفل مريض، ماتوديهوش لجدو و تيتة!
❓امتى اتحرك لطبيب الأطفال؟
١. لو الطفل سخن، خصوصا لو حرارة عالية
٢. لو بيكح....اى طفل بيكح حاليا لازم يروح للدكتور
٢. لو فيه اى مشاكل فى التنفس، او بلغم تقيل، او صوت شخللة فى صدره
❓ هل له علاقة بالحضانات و المدارس؟
✅ طبعا إختلاط الاطفال ببعض بيزود فرص العدوى
✅ لو ظروفك تسمح، الطفل يفضل يبدأ الحضانه بعد موسم التعب و الفيروسات و الكورونا ده ما يخلص
✅ لو ظروف شغلك لا تسمح، اختارى مكان نضيف على قد ما تقدرى
✅لو الطفل عنده برد، ارجوكم ماتنزلوهوش الحضانه او المدرسة...علشان ولاد الناس التانية، و علشان ابنك يرتاح و يتراعى صح.
تعليقات